男人需要擁抱嘅4個時候

女人想完完全全俘虜男人嘅心，方法好簡單。男人唔似女人時時要聽對方講「我愛你」先至安心，亦唔需要事事照顧周到嘅女人，因為佢已經有一個媽媽，唔使要多一個女人管住佢。

其實男人最渴望嘅係被擁抱嘅感受，你只要喺適當時候俾個擁抱佢，呢個無聲嘅支持分分鐘比言語更加窩心。以下4個時候，男人都極需要女人嘅默默擁抱： 

1. 放工回家後

擁抱可以俾佢帶嚟安慰，當男人工作壓力大嘅時候，伴侶溫暖嘅擁抱可以令佢哋回復鬥志。如果你淨係好似佢阿媽咁，又要佢快啲沖涼食飯，又問長問短，只會令佢更大壓力。與其係咁，不如俾佢一個沉默嘅擁抱，做佢唯一嘅避風塘吧！    

2. 同佢分別時

擁抱可以令佢感到你對佢嘅依賴，被需要嘅感覺係男人最大嘅動力。俾佢一個離別時不捨嘅擁抱，可以令佢整日都掛住你。   

3. 一齊瞓覺時

女人如果靠住男人個膊頭瞓，等佢輕輕攬住你，呢種擁抱可以令男人覺得完整同滿足，兩人嘅關係可以變得更具信任同sweet，瞓都瞓得甜啲啦！     

4. 鬧交後

睇住佢好嬲咁走，女生只要把握時間，喺佢背後攬住佢，雙手緊緊攬喺佢腰間，成塊面伏喺佢背上，乜都唔使講，亦唔使做其他動作，男人自然會感受到你嘅祈求同無助，再無情嘅男人都會唔捨得一走了之。

*********************************************************************************************************

嗯！大頭，明白了！

By 大頭阿麗